இரத்த சோகை அறிவு திறன்களைப் பாதிக்கிறது

பொதுவாகவே, இரத்த சோகையை நாம் சோர்வு, உடல் வெளிறிப்போதல், மூச்சுத் திணறல் போன்ற அறிகுறிகளுடன் தொடர்புபடுத்துவோம். இருப்பினும், இந்த தீவிர உடல்நலக் குறைபாட்டின் பாதிப்புகள், வெளியில் தெரியும் அறிகுறிகளைத் தாண்டி இன்னும் ஆழமானவை ஆகும். இரத்த சோகைக்கும் அறிவு சார்ந்த செயல்பாடுகளுக்கும் (cognitive performance) இடையே வலுவான தொடர்பு இருப்பதாகப் பல ஆதாரங்கள் சுட்டிக்காட்டுகின்றன. உங்கள் இரத்தத்தின் நிலை, உங்கள் மூளையின் செயல்பாட்டை நேரடியாகப் பாதிக்கிறது. இது நினைவாற்றல் இழப்பு, கவனத்தைச் செலுத்துவதில் சிரமம் போன்ற சிக்கல்களை உருவாக்கக்கூடும். எந்த வயதிலும் மனநலத்தைப் பேணுவது அவசியமானது ஆகும். அதற்கு, இரத்த சோகைக்கும் மூளையின் செயல்பாட்டிற்கும் இடையிலான இந்தத் தொடர்பைப் புரிந்துகொள்வது மிக முக்கியம் ஆகும்.

இரத்த சோகை என்றால் என்ன? அது ஏன் மூளையைப் பாதிக்கிறது?

ஹீமோகுளோபின் என்பது உடல் முழுவதும் ஆக்ஸிஜனைக் கொண்டு செல்லும் ஒரு புரதமாகும். ஆரோக்கியமான இரத்தச் சிவப்பணுக்கள் அல்லது ஹீமோகுளோபின் குறைபாடு இரத்த சோகையை ஏற்படுத்துகிறது. ஹீமோகுளோபின் அளவு குறையும்போது, ​​மூளைக்குக் கிடைக்கும் ஆக்ஸிஜனின் அளவும் குறைகிறது. லேசான பாதிப்புகளில்கூட, மூளையில் ஏற்படும் ஆக்ஸிஜன் பற்றாக்குறை நரம்பியல் செயல்பாட்டைப் பாதித்து, அறிவாற்றல் குறைபாட்டிற்கும் வழிவகுக்கிறது. குறைந்த ஹீமோகுளோபின் திசுக்களின் ஆக்ஸிஜனேற்றத்தைக் குறைக்கிறது. இது அறிவுசார் மற்றும் உடல் செயல்திறன் இரண்டிலும் எதிர்மறையான தாக்கத்தை ஏற்படுத்துகிறது.

அறிவாற்றல் குறைபாட்டிற்குப் பின்னால் உள்ள நுட்பங்கள்

இரத்த சோகை மூளையை எப்படி எல்லாம் பாதிக்கிறது என்பதை விளக்கும் பல உயிரியல் வழித்தடங்கள் இதோ:

• மூளைக்கு ஆக்ஸிஜன் குறைதல்: இரத்த சோகையால் மூளைக்கு ஆக்ஸிஜன் கிடைப்பதும், இரத்த ஓட்டம் தடைபடுவதும் நிகழ்கிறது. நீண்டகால ஆக்ஸிஜன் பற்றாக்குறை, இரும்புச்சத்து உடலில் செயல்படும் விதத்தை மாற்றுகிறது. இது அமைலாய்டு-பீட்டா புரதத்தின் உற்பத்தியை வேகப்படுத்துகிறது. இந்த வகை புரதம், மறதி நோய் மற்றும் அறிவாற்றல் குறைபாட்டுடன் தொடர்புடைய ஒரு வேதிப்பொருள் என்பதைக் குறிப்பிடவேண்டும்.

• அழற்சியும், ஆக்ஸிஜனேற்ற அழுத்தமும்: இரத்த சோகை காரணமாக குறைந்த தர அழற்சிக்கும், ஆக்ஸிஜனேற்ற அழுத்தத்திற்கும், மூளை தொடர்ந்து வெளிப்படும் போது, அது மிகவும் பாதிக்கப்படக்கூடிய சூழல் உருவாகலாம்.
• இரும்புச்சத்து குறைபாடு மற்றும் Neurotransmitters எனப்படும் நரம்பியக்கடத்திகள்: மைலினேற்றம், மூளை வளர்சிதை மாற்றம் மற்றும் செரோடோனின், டோபமைன் போன்ற Neurotransmitters-களின் உற்பத்தி ஆகியவை இரும்புச்சத்தை சார்ந்துள்ளன. கற்றல், நினைவாற்றல், மனநிலை மேலாண்மை ஆகிய அனைத்தும் இரும்புச்சத்து குறைபாட்டால் எதிர்மறையாகப் பாதிக்கப்படுகின்றன.

வைட்டமின் பி12 குறைபாட்டினால் ஏற்படும் இரத்த சோகையின் தனித்துவமான பங்கு

வைட்டமின் பி12 குறைபாட்டினால் ஏற்படும் இரத்த சோகை, ‘மெகாலோபிளாஸ்டிக் அனீமியா’ (Megaloblastic anemia) என்று அழைக்கப்படுகிறது. இது ஒரு தனித்துவமான பாதிப்பைக் கொண்டிருப்பதாலும், அறிவாற்றல் செயல்பாடுகளில் மீள முடியாத விளைவுகளை ஏற்படுத்தக்கூடும் என்பதாலும், இதற்குச் சிறப்பு மருத்துவ சிகிச்சை தேவைப்படுகிறது. நரம்பு இழைகளைச் சுற்றி ஒரு பாதுகாப்பு உறையாக விளங்கும் ‘மையலின் உறை’ (Myelin sheath) உருவாவதற்கு வைட்டமின் பி12 அவசியமாகும். இந்த உறை நரம்பு சமிக்ஞைகள் விரைவாகக் கடத்தப்படுவதை உறுதி செய்கிறது. உடலில் வைட்டமின் பி12 அளவு குறையும் போது, ​​இந்த மையலின் உறை சிதையத் தொடங்குகிறது (Demyelination). இத்தகைய சூழலில், மூளையின் தகவல் தொடர்பு செயல்முறை மெதுவடைகிறது அல்லது முற்றிலும் நின்றுவிடுகிறது.

வைட்டமின் பி12 குறைபாட்டால் ஏற்படும் அறிவாற்றல் பாதிப்புகள், பெரும்பாலும் டிமென்ஷியா அல்லது முதுமை எனத் தவறாக எடுத்துக்கொள்ளப்படுகின்றன. குழப்பம், நினைவாற்றல் இழப்பு, மந்தமான சிந்தனை, சில சமயங்களில் ஆளுமை மாற்றங்கள் ஆகியவை இந்த அறிகுறிகளில் சிலவாகும். தீவிரமான சூழ்நிலைகளில், வைட்டமின் பி12 பற்றாக்குறையானது வாஸ்குலர் டிமென்ஷியா அல்லது அல்சைமர் நோயை ஒத்திருக்கலாம். நீண்ட காலத்திற்கு சிகிச்சையளிக்கப்படாமல் விட்டால், வைட்டமின் பி12 குறைபாடு மீளமுடியாத நரம்பியல் பாதிப்பை ஏற்படுத்தும். இது இரும்புச்சத்து குறைபாட்டின் அறிவாற்றல் பாதிப்புகளுக்கு முற்றிலும் முரணானது ஆகும். இரும்புச்சத்து குறைபாடு பெரும்பாலும் இரும்புச்சத்து மாத்திரைகள் மூலம் சிகிச்சையளிக்கப்பட்டு குணப்படுத்தப்படுகிறது என்பது குறிப்பிடத்தக்கது. அதனால்தான் ஆரம்பத்திலேயே இதனை கண்டறிவது முக்கியம் ஆகும்.

வலுவான சான்றுகள்

பல்வேறு இனக்குழுக்களிடையே நடத்தப்பட்ட ஆய்வுகளின்படி, இரத்த சோகைக்கும் (anemia) அறிவாற்றல் குறைபாட்டிற்கும் இடையே தெளிவான தொடர்பு இருப்பது கண்டறியப்பட்டுள்ளது. இரத்தத்தில் உள்ள ஹீமோகுளோபின் அளவிற்கும், பத்து வகையான அறிவாற்றல் சோதனைகளில் காட்டப்படும் செயல்திறனுக்கும் இடையே நேர்மறையான தொடர்பு இருப்பது இந்த ஆய்வில் கண்டறியப்பட்டது. இதில் நினைவாற்றல் சார்ந்த சோதனைகளில் மிக வலுவான தொடர்பு காணப்பட்டது. இந்த ஆய்வு, டிமென்ஷியா (dementia) பாதிப்பிற்கு இரத்த சோகை ஒரு முக்கியமான, அதே சமயம் சரிசெய்யக்கூடிய ஆபத்துக் காரணியாக இருக்கலாம் என்பதை வலுவாக உணர்த்துகிறது. 

இரத்த சோகை இல்லாதவர்களிடம் கூட, இரும்புச்சத்து கூடுதல் உணவாக வழங்கப்பட்டபோது, ​​அவர்களின் அறிவுசார் திறன் மற்றும் குறுகிய கால நினைவாற்றல் மேம்பட்டன. இரத்த சோகை முழுமையாக உருவாவதற்கு முன்பே இத்தகைய அறிவுசார் முன்னேற்றங்கள் காணப்பட்டன என்பது கூடுதல் சுவாரஸ்யமாகும். இதிலிருந்து, இரத்த சோகை இல்லாத நிலையிலும் கூட, இரும்புச்சத்து குறைபாடு மூளையின் செயல்பாட்டைப் பாதிக்கிறது என்பது தெரியவருகிறது.

வைட்டமின் பி12 (Vitamin B12) தொடர்பான தலையீட்டு ஆய்வுகளின் முறையான மதிப்பீட்டின்படி, வைட்டமின் பி12 குறைபாடுள்ள நபர்களுக்கு, இந்தச் சத்துச் சேர்க்கையை வழங்குவது அவர்களின் அறிவாற்றல் செயல்பாட்டில் முன்னேற்றத்தை ஏற்படுத்தியது கண்டறியப்பட்டுள்ளது. இது லேசான முதல் மிதமான குறைபாடுள்ள நபர்களுக்குப் பொருந்திப்போனது. பாதிப்புகளைச் சரிசெய்யக்கூடிய கால அவகாசம் மிக முக்கியமானது என்பதால், ஆரம்ப நிலையிலேயே பரிசோதனை செய்துகொள்வது இதனால் தான் அவசியமாகிறது.

இந்தியாவில் இரத்த சோகையின் பரவல்

இந்தத் தொடர்பின் முக்கியத்துவம் இந்தியாவில் மிக அதிகமாக உள்ளது. நம் நாட்டில் இரத்த சோகை (anemia) பாதிப்பு தொடர்ந்து அதிக அளவில் காணப்படுகிறது. தேசிய குடும்ப சுகாதார ஆய்வின் (National Family Health Survey) தரவுகளின்படி, சென்னை மாவட்டத்தில் மட்டும் இரத்த சோகையினால் பாதிக்கப்பட்டவர்களின் விகிதம் 42.4% ஆக உள்ளது. இப்புள்ளிவிவரங்கள், இதைக் கண்டறிவதற்கும் (screening) உரிய நடவடிக்கைகளை எடுப்பதற்கும் (intervention) எவ்வளவு அவசரத் தேவை உள்ளது என்பதை உணர்த்துகின்றன. எனவே, இதன் தாக்கம் உடல் ஆரோக்கியத்தில் மட்டுமல்லாமல், அனைத்து வயதுப் பிரிவினரின் அறிவுசார் நல்வாழ்விலும் (cognitive well-being) உள்ளது என்பதை புரிந்துக்கொள்ள வேண்டும்.

உங்கள் அறிவாற்றல் ஆரோக்கியத்தைப் பாதுகாத்தல்

உங்களுக்கோ அல்லது உங்கள் அன்புக்குரியவர்களுக்கோ மீண்டும் மீண்டும் மூளை மந்தம், நினைவாற்றல் சிக்கல்கள் அல்லது காரணமற்ற சோர்வு ஏற்பட்டால், ஹீமோகுளோபின், ஃபெரிட்டின், வைட்டமின் பி12 ஆகியவற்றின் அளவுகளைச் சரிபார்க்க வேண்டியது அவசியம் ஆகும். இரத்தசோகை பெரும்பாலும் குணப்படுத்தக்கூடியது தான். ஆரம்பத்திலேயே சிகிச்சை அளித்தால் நீண்டகால அறிவாற்றல் பாதிப்புகளைத் தடுக்கலாம். ஒரு எளிய இரத்தப் பரிசோதனை அதற்கான வழியை காட்டி, பொருத்தமான சிகிச்சைக்கு வழிகாட்டும். அறிவாற்றல் மாற்றங்களை வயதாவதன் இயல்பான பகுதி தான் என்று கருதி புறக்கணிக்காதீர்கள். அவை குணப்படுத்தக்கூடிய ஒரு அடிப்படை நோயின் அறிகுறியாகக்கூட இருக்கலாம்.